berriak
“Otoitz egiteko, sagaratze espiritualeko giroa erraztuko duen
forma eta kolorea aurkitu nahi izan dut konbinazio estetikoz.
Ez dut dotrina egin nahi izan neure beirateekin”.
Javier Álvarez de Eulate
Javier Álvarez de Eulatek Arantzazuko Santutegiarentzat forma biribileko zortzi beirate sortu zituen, eta zeharkako nabeko goialdean kokatu zituen modu simetrikoan. Beirateak abstraktuak dira, eta forma suabeak eta uhin itxurakoak dira nagusi. Kolore urdina baliatu zuen gehien Eulatek, hala ere, ageri dira gorriz eta zuriz tindaturiko zenbait beira-gune.
Eulatek berak honako irakurketa egin zien beirateei: “Konposizioak dira zeinetan lerroek elkarrekin gurutzatuz, txandaka, espazio argi-ilunak sortzen dituzten. Hori dena urdin, berde, more eta gorri koloreko armoniaren baitan. Konposizio abstraktuak dira batez ere, baina bada erreferentzia figuratiborik: agerraldiko elorria gogorarazten duten formak eta, beiren atzealdean itxuraldaturik, elizako harrizko hormak argi urdin misteriotsu batez tindatzen dituen Arantzazuko mendi-paisaia”.
Beirateak Basilikan gustu onez daude integraturik. Ez dira bereziki nabarmentzen, izan ere, proiektuaren ideia nagusiari moldatu zitzaizkion Jainkoaren etxea dekoratzeko asmoz.
Kristauarentzat argiak bizitza, salbazioa eta zoriontasuna sinbolizatzen ditu. Ongia irudikatzen du, iluntasunari, gaizkiari eta negatiboa denari kontrajarria. Eraikin erlijiosoan proiektatutako argia zuria izan ohi da, baina izan dezake beste kolorerik. Kolore-tonu eta -nahasketa desberdinak inguruan efekturen bat lortzeko asmoz erabiltzen dira. Beirateek dute funtzio hori betetzeko ardura.
Javier Álvarez de Eulatek haren beirateekin dekoratu zituen Arantzazuko Basilikaren zeharkarko nabeko bi aldeak. Prozesu hori 1954ko ekainean hasi zen. Verreries de Saints-Just-sur-Loire beirategiak, kristalak egiteko ardura zuenak, orduan jakinarazi zien zein izango zen kolore bakoitzaren prezioa. Beirateen inguruan lanik egin gabe bi urte egon ostean, 1957an abian jarri zen berriz ere proiektua. Frantziskotarrek aduanetako ordainketa-salbuespeneko eskaera egin zuten Aulki Santuaren Konkordatuko 20. artikuluan oinarriturik. Horren arabera, gurtza katolikoko objektu guztiek zerga-salbuespena dute. 1957ko apirilaren 3an onartu zieten beirateak egiteko ordainketa-salbuespena. Eulate lanean hastea ahalbidetu zuen ordainketa urte bereko abenduan egin zuten Kubako frantziskotarrek. Santutegi berriari hala egin nahi izan zieten beren ekarria.
Beirateak Metzen, Frantzian, egin ziren artistak berak bidali zizkien kartoiak modelo gisa izanik, eta erabilitako teknika hormigoi zeharargitsuarena edo, Eulatek berak esan zion bezala,“mosaiko gardenarena” izan zen, koloreetako beira lodiak zementuan txertatzearena, alegia.
Javier Álvarez de Eulate Donostian jaio zen 1919ko apirilaren 26an. Madrilgo San Fernando Arte Ederretako Akademian ikasi zuen bi urtez. Handik heldu zen Arantzazura. Basilika berriko lanekin harremanetan hasi zen orduan.
Haren obran eragin gehien izan zuten artistak Jesús Vasiano, Gerra Zibil garaian harekin izan zen Iruñean, Ignacio Zuloaga eta Valentín de Zubiaurre izan ziren. Baina Eulatek arteaz zuen ikuspegian eta artea gauzatzeko moduan eragin handiena Jorge Oteizarengandik etorri zitzaion.
Bere artelanak figurazioari nahiz abstrakzioari lotu zitzaizkion. Tamaina txikiko obrak egin zituen, hark “erauntsiaren ondorenak”, “diagonalak” eta “agerraldirako guneak” deitu zituenak; baita eraikin erlijiosoetako absideak dekoratzeko mural handiak ere. Azpimarragarriak dira Donostiako San Ignacio Elizarako eta Oñatiko benediktarrentzat egindako erretaulak eta Bergarako Magdalena ermitarako sortutakoa.
Eulateren obra koloretsuak naturaz gaindi dagoenaren beharra erakusten du, eta ukitu daitekeen mistizismoa islatzen: “Ikuslea goi mailako errealitatera eraman nahi dut, ikusgai denetik ikusezinera, baina erreala denera”.
Horixe da Arantzazu: “bila dabiltzan pertsonentzako lekua”, eta honakoa gure eskaintza:
Gure cookieak eta hirugarrenenak erabiltzen ditugu helburu analitikoetarako eta publizitate pertsonalizatua erakusteko, zure nabigazio-ohituretan oinarrituta (adibidez, bisitatutako orrialdeak). Cookie guztiak onar ditzakezu "onartu" botoia sakatuz edo horiek konfiguratuz edo haien erabilera ukatuz "konfiguratu" botoia sakatuz. Informazio gehiago lor dezakezu edo, ondoren, doikuntzak aldatu gure Cookien politikan.
