Fundazioa

Argazkia Naiara Goia Imaz webNaiara Goia Imaz (Segura, 1978) izango da Arantzazuko Gizarte Berrikuntza Laborategiko zuzendaria, Arantzazu Gaur Fundazioko patronatuak iragan ostiralean izendapena onartu ondoren. Berrikuntzan eta nazioarteko proiektu estrategikoen koordinazioan aditua, Telekomunikazio Ingeniaritzan goi-mailako tituluduna da, eta azken urteak MONDRAGON Korporazioan egin ditu, kooperatiben sarean berrikuntza sustatzeko eta enpresen eraldaketarako estrategiak bultzatzeko ekimenen lidergoan.

Arantzazuk gizarte berrikuntza sozialerako laborategia izango du udazkenetik aurrera. Elkarlanean oinarrituta, erakunde askoren artean ondutako fruitua da. Arantzazuren etorkizunari buruzko hausnarketa estrategikoa egin ondotik, bi urte dira ideia garatzen hasi zenetik. Pixkanaka-pixkanaka proiektuaren oinarriak ezartzen joan dira, eta barne lanketa emankorra egin eta gero, Arantzazu Gaur Fundazioaren Patronatuak laborategiaren proiektua onetsi du.

Arantzazuk historian zehar erakutsi duen izaera eraldatzaile eta berritzailearekin bat eginik, laborategiak elkarbizitza, lana, trantsizio ekologikoa nahiz ongizatea jorratuko ditu gizartean sor litezkeen beharrizanei erantzuteko helburuarekin. Partaidetzazko prozesuen bidez, proiektuak aipaturiko esparruetan aurrerabideak eskaini nahi ditu etorkizun gizatiarragoa lortzeko asmoz. Laborategia Arantzazuko Gandiaga Topaguneko zentroan kokatuko da.

‘Eulate + Ayesta. Arte- eta bizitza-esperientzia bat’ izeneko erakusketa azken txanpan sartu da. D’Museoan, Donostiako Santa Marta Museoan, igandea arte, ekainak 28, ikusgai izango dira Xavier Álvarez de Eulate (Donostia, 1919 – Bermeo, 2012) artista frantziskotarraren eta Juan Ayesta (Beasain, 1960) margolariaren artelanak. Erakusketa gertutik ezagutu nahi duenarentzat, antolakuntzak azken bisita gidatua eskainiko du ostiral honetan bertan (ekainak 26). Arratsaldeko 18:00etan hasita, Juan Ayesta margolariak gidatuko du doako saioa. Bisita gaztelaniaz izango da, eta parte hartzeko aurrez izena ematea komeni da 617256284 telefono-zenbakira deituta edo Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. posta elektronikora idatzita. Bestalde, honako hau da erakusketaren ordutegia: lan egunetan, 10:30etatik 13:30etara eta 16:00etatik 19:00etara; larunbatean, 10:30etatik 13:30etara eta 16:00etatik 18:00etara; eta igandean, aldiz, 16:00etatik 19:00etara.

Arantzazuko Kaligrafia Jardunaldien antolakuntzak ekimenaren ohiko data atzeratzea erabaki du COVID-19 birusaren hedapenak sorrarazi duen egoera dela eta. Osasun egoerak aukera ematen badu, tailerren VI. ekitaldia, uztailean egitekoa zena, Arantzazuko Gandiaga Topaguneko kultur zentroan izango da abenduaren 11tik 12ra bitartean. Era berean adierazi behar dugu, Kaligrafia Jardunaldien inguruko xehetasunak nahiz izen-ematearen inguruko informazioa irailean ezagutzera emango direla. «Arantzazu Letraz Gunea» proiektuaren baitan kokatzen den ekimenak, Arantzazu Gaur Fundazioak eta UPV/EHUko «LETRAZ» Diseinu Grafikoko eta Tipografiako Ikerketa Taldeak sustatzen dutena, aurreko urteetako lan ildoari eusteaz gain, Arantzazuk kaligrafiarekiko piztu duen interesari ere erantzun nahi dio.

D’Museoak eta Arantzazu Gaur Fundazioak elkarlanean antolatuta, ikusgai dago jada ‘Eulate + Ayesta. Arte- eta bizitza-esperientzia bat’ izeneko erakusketa D’Museoan, Donostiako Santa Marta Museoan. Inauguratu berri den proiektuak gogora ekarri nahi ditu Xavier Álvarez de Eulate (Donostia, 1919 – Bermeo, 2012) artista frantziskotarra eta Juan Ayesta (Beasain, 1960) margolaria. Biek ala biek giza harreman eta artistiko estua izan zuten. Horren isla da bien lanekin osaturiko bilduma. Artelanak apirilaren 19a arte ikus daitezke D’Museoan.

Arantzazuko Adiskideak elkartearen, Arantzazu Gaur Fundazioaren eta Arantzazuko Parketxearen ekimenenez, Mikopoteo jardunaldia izango da Arantzazun azaroaren 16an. Hitzorduaren IX. ekitaldia Gandiaga Topagunean abiatuko da (18:00) Raul Fraile adituak eskainiko duen ‘Magia mikologikoa: perretxikoen inguruko gauza harrigarriak’ hitzaldiarekin.

Jarraian, Arantzazuko Santutegia Hotela, Goiko-Benta, Milikua, Sindika eta Zelai-Zabal jatetetxeetako sukaldariek prestatutako mikopintxoak aurkeztuko dituzte. Ondoren, bertaratutakoek Arantzazuko gastronomia-zirkuituko ibilbidea egingo dute ekitaldi honetarako sortutako mokadu bereziak dastatzeko xedez. Informazio gehiago: 943782894/669335183 edo Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.
 

Oskarbi Taldeak kantaldi berezia eskainiko du Arantzazun Jorge Oteiza eta Bitoriano Gandiaga gogoratzeko xedez. Eskultorearen ibilbide artistikoa omentzeko ere baliatuko du hitzordua talde gipuzkoarrak. ‘Oteizaren hutsunetik, Gandiagaren hitzetara’ izenburupean, doako kontzertua urriaren 12an (18:00etan) izango da Gandiaga Topaguneko areto nagusian. Kantu emanaldiak Orioko eskultoreak duela 50 urte bukatu zuen proiektu eskultorikoaren mende erdiko ospakizun programarekin bat egingo du. ‘Oteiza eta Arantzazuko estatuaria, 1950-1969’ izenburupean garatzen ari den egitaraua, Jorge Oteiza Fundazio Museoak, Arantzazu Gaur Fundazioak eta Arantzazuko Frantziskotarrek prestatu dute.

Arteak eta sormenak bat egingo dute, beste behin ere, Maushaus arkitektura-estudioren eskutik Arantzazuko Gandiaga Topagunean. Izan ere, 6 eta 12 urte bitarteko haurrei zuzendutako lantegiaren lehen saioa egingo baitute larunbatean (10:30-13:30). ‘Harrizko gorputza, buztinezko arima’ izenburupean, tailerrak bere partaide kopurua beteta du jada, eta honebestez, ekimenak aurreko urteetan antolatutako antzeko lantegien arrakasta errepikatuko du.

Gandiaga Topaguneak, 2019ko irailaren 21ean, oroitzapen-jardunaldia hartuko du Arantzazuko basilikako fatxadan Oteizaren obra jarri zuteneko 50. urteurrenaren harira. Ospakizun berezi horretan zehar, Oteiza eta Arantzazu gai dituzten adituek osatu mahai ingurua izango da, Elena Martinek Oteizaren proiektuari buruz egingo duen azalpen irakurketarekin batera; eta, guztia osatzeko, Kukai Dantza-ren emanaldia.

Arantzazuko Basilikako beirateen egile den Xavier Álvarez de Eulateren ibilbide artistikoa aintzat hartzea eta egindako lanari omenaldia egitea izango da irailaren 14an, larunbata, Arantzazuko Adiskideak elkarteak eta Arantzazu Gaur Fundazioak antolatzen duten pintura-lehiaketako xede nagusia. Hitzorduaren 7. ekitaldia berezia izango da. Izan ere, artista frantziskotarraren jaiotzaren mendeurrena baita aurten. Halaber, Jorge Oteizak Arantzazun gauzatutako proiektuaren 50. urteurrenaren harira, eskultore oriotarra eta haren lanak gogoan izango dituzte. Hori dela eta, antolakuntzak 'Oteiza eta Arantzazuko estatuaria' sari berezia sortu du.

FaLang translation system by Faboba