liturgi lagungarriak

 

A) APAIZAREN MONIZIOAK

 

AGURRA ETA SARRERA

Gure bihotzen Jaun egin zaigun Jesus Jauna, bego zuekin!

 

Hona hemen beste behin elkarrekin, otoitz egin eta eukaristia ospatzeko asmoz. Zergatik gauden hemen? Jainkoak beregana gidatzen gaituelako gure bizitzan eta beregana eramaten. Eta Jesu Kristorengan dugun fedea beste behin aitortu nahi dugu. Aitortu eta ospatu.

Hitzak eta dohainak bete dezatela erabat gure bihotza eta eman diezagutela indarra bidean aurrera egiteko.

 

 

DAMU OTOITZA

Adiskideok, Jesusekiko gure atxikimenduak sarri berritu beharra izaten du. Askotan bihotza, Jainkoarekiko eta hurkoekiko maitasunaz ez, baizik beste gauzez betetzen baitzaigu. Horregatik, bekatari garela aitortuz, egigun otoitz batak besteran alde.

 

- Jesus Jauna, Mesias Jauna, Jainko biziaren Semea. Erruki, Jauna.

- Jesus Jauna, Elizari tinko eusten dion harkaitza. Kristo, erruki.

- Jesus Jauna, gure bidea, gure egia eta gure bizia. Erruki, Jauna.

 

 

PREFAZIOA

Jainko Biziaren Seme Jesu Kristorekin bat egin dezagun, Eliza osoaren esker ona Aitari agertzeko. Pedroren fedez, gogotik, presta gaitezen Jesusen gurutzebidea geure  bide egiteko.

 

 

GURE AITA

Erreinuko giltzak dituen Pedroren etxean gaude denok. Eta hemen, Jesusek irakatsi bezala, beldurrik gabe esaten da kristauon otoitza.

 

 

HONA HEMEN

Hona hemen Jaungoikoaren Bildotsa, Jesus, Mesias dena, Jainko Biziaren Semea. Zorionekoak honen mahaira deituak.

 

 

 

 

 

B) IRAKURGAIEN MONIZIOAK

1) Jesusen bizitzako une espezial bat ematen digu gaurkoan ebanjelioak: Pedroren aitormenaren pasadizoa eta nola Jesusek erreinuko giltzak agintzen dizkion. Aurretik, orain, Jaunak antzinako gizon zintzo bati egiten dion deia entzungo dugu: bere herriaren kargua eta erantzukizuna emango dizkio, gero Pedrori bezala.

 

2) Gaurkoan ere Erromatarrei egindako gutunetik irakurtzen jarraituko dugu: Jaunaren salbamen asmoak aurkeztu ondoren, Paulok goratzarre dotorea ematen digu. Gogoan jasotzeko modukoa!

 

 

 

 

HERRI-OTOITZA

 

Fede berean bat eginik, otoitz egiogun guztion Aitari.

 

Munduan bizi den Elizaren alde. Eliza guztietako kristauen alde:

Berrio Onaren testigantza askatzailea eman dezaten.

 

Pedroren ondorengoa den Frantzisko Aita Santuaren alde eta gure Gotzainaren eta beste Gotzain guztien alde:

fededun guztientzat erreferentzi puntu argia izan daitezen.

 

Munduko herri guztien alde; batez ere, Gaza, Ukraina, Irak eta gatzaka bizi duten herri guztien alde:

guztien solidaritateak eta justiziazko harremanak duintasunera jaso ditzan.

 

Gure artean gehien sufritzen dutenen alde; gaixorik, kartzelan edo bakardadean, maitasunik gabe edo beldurrez sufritzen dutenen alde; Afrikan ebola gaitzak kolpatu dituenen alde:

fededunengan beren sufrimendurako argia eta laguntza aurki ditzaten.

 

Geure alde, gure senide eta adiskideen alde, gure gaixoen alde:

fedean hazi gaitezen, Jaunaren maitasuna ospatuz.

 

Entzun, Aita ona, zure seme-alaben eskariak, eta emaguzu, uste onenaz eskatu dizuguna. Jesu Kristo gure Jaunaren bitartez.

 

 

 

 

HOMILIA

 

Gaurko ebanjelio-zatiak zedarrian kokatzen gaitu. Gaurko ebanjelio-zatiak garrantzi handia baitu Mateoren ebanjelioan. Pedrok egin duen mesiastasun-aitorpen honek, Nekaldiko bidean jarriko du Jesus, argi eta garbi. Eta nekaldiko bide honek sustrai-sustraitik aterako ditu mesiastasun politiko baten uste sasikoak. Gainera, gerora eliz tradizioan garrantzi handia izan duen Jesusen deklarazioaren aurrean gaude: «Harria zara zu».

 

Jesusek dakarren askatasun salbatzaileak baditu bere bitartekoak. Eta ez goitik behera zerutar euriz etorritako bitartekoak, hain justu. Pedro da bitarteko horietako bat. Jainkoak horrela nahi izan du. Jainkoak giza bideetan ez ezik giza erara ere jokatzen baitu. Hitza gizaki egin denetik, gizakia bitarteko egina izan da. Erabat gizatar bihurtu da Jainkoaren dohaina. Jainkoak, hain zuzen, Pedroren sendotasun-gainean eraiki nahi izan du Eliza. Pedrok sendotasuna demaio fedeari. Eta sendotasun horrek eragin berezia du. Askotan, kritikaren begirada estuak oso ikuspegi estura eramaten gaitu bitartekoak epaitzerakoan. Igande hau aproposa izan daiteke, behin baikere Pedroren ondorengoaren egitekoa, Aita Santuaren  egitekoa, begiratu eta maitatzeko.

 

Hala ere, Pedro ez dago dagoen tokian, bera zintzoa delako, bera argitasun bereziko gizona delako. Pedroren egitekoa ez da Pedroren zintzotasunean oinarritzen, ez, bere fede-aitorpenean baizik. «Nor naizela diozue?». «Zu Mesias zara, Jaungoiko biziaren Semea». Pedrok, noski, formula bat baino askoz gehiago esan du esaldi horretan. Esaldi horrek, Elizaren historia oinarritzen eta luzatzen duen jarrera gordetzen du bere barnean: Zu zara gure bizia, Zu zara gure garrantzizkoena, Zu zara gure itxaropen betea, Zuregan aurkitzen dugu gure giza betetasuna. Pedroren aitorpena handia izan da. Eta hori ez da Pedro berarengandik sortu. Aitorpen honen giharrea Jainkoaren dohaina da. Jainkoak argitu du Pedro federako.

 

Eta fede hori erreferentzi puntu bihurtua geratu da Elizaren historia guztirako. Hemendik aurrera bere fedea neurtu eta argitu nahi duenak, aski du Pedroren aitorpen honetan neurtzea. Aitorpen horrek elkartzen du Eliza. Pedro izango da, beraz, eliz elkartearen batasun lokarri. Pedrok eutsiko dio indarrean Elizaren komunioari, elkartasunari. Eta horrek esan nahi du apostoluen fedean oinarritzen dela betidanik gure eliz izatea. Eta Pedro da apostoluen buru.

 

Honek guztiak halako errezeloa sor dezake: administrazioa sortzen ari ote den Jesus, Pedrori gauza hauek esatean! Elizaren burokrazia! Eta ez da hori, noski. Jesusen misterioak irabazi digun askatasuna eskaintzen digu giza zerbitzu honetan. Eskura jartzen digu Jesusek bere salbamena. Ez daukagu ez dakit non eta ez dakit nola ibili beharrik salbamen hori nondik jasoko! Ez, gure mailan eman zaigu.

 

Horregatik, Paulok jo duen oihua. «Bai handia Jaungoikoaren eskuzabala, jakinduria eta ezaguera!». Misterio handia era gizatiarregian eman zaigula? Handiegia dela, horrenbeste gerturatzeko? «Ezin aztertuak haren erabakiak». Eta zenbaitetan oztopo-harri gertatzen bazaigu ere, Elizaren errealitateak bertatik bertara jartzen digu misterioa. Eta Elizaren giza maila ikusi eta bestea ez ikustea, ez litzateke ez zintzoa ez jatorra izango! Galde daiteke: Berri Onaren zerbitzuan horrenbeste miseria? Edo beste hau galde daiteke: horrenbeste miseriaren erdian, horrenbeste askatasun? Ea zerk harritzen zaituen gehiago, miseriak ala dohainak!

 

Gaur, inoiz egitekotan, otoitz egin behar genuke gure Aita Santuaren alde, gure Gotzainen alde. Eta eliz zerbitzuan sarritan bizi ditugun eskandaluak bere onean ikusten eta onartzen jakin behar genuke. Gauza handiak jarri zaizkigu gertura. Handiegiak gertuegira aukeran. Urrutian gelditu izan balira Jainkoaren dohain horiek, ez genituen zikinduko, baina urrutian geldituko ziren, eta ezin gozatu. Gure eskura jartzeak horrenbesteraino zikintzen du misterioa, baina gutxienez misterioa gertuan daukagu. Bakoitzak misterioaren neurria emango bagenu gure bizitzan! Bakoaitzak geure fedea sendotzen dugun adinean, Elizak berak txukunago beteko du bere bitartekotza. «Zuk nor naizela diozu?». Erantzun nahi baduzu, aukera ederra daukazu eskura.

 

Ez genuke gauza bat ahaztu behar: Jainkoarengana ez gaituela hurbiltzen gure perfekzioak, gure akatsik-ezak. Jainkoarengana Jainkoaren dohainak berak hurbiltzen gaitu. Eta hori guk merezi ezin dezakegun zerbait da. Ez dugu, beraz, eliz zerbitzarien akatsez harritu behar, eman zaigun dohain ederraz baizik. Zer dute harrigarria gure akatsek? Baina bai dela harrigarri, horrenbeste akatsen artean ematen zaigun maitasunezko dohain ederra!

 

Jesusen bideetan elkar zerbitzen ikas dezagun. Gizon-emakumeen zoriona baita azkenean garrantzizkoa. Ez dezagun ahaztu denok garela Jainkoaren dohainaren zerbitzari gure ingurukoen aurrean. Guztioi gure fedearen aitorpena eskatu zaigu eta guztiok izan gara dohainaren zabaltzaile eginak! Ez genuke ahaztu behar! Dohain handiegia jarri zaigu eskura, eta dohaina gordetzeko era bakarra maitasunez zabaltzea da.

 

Eukaristia ospatzen dihardugu. Eta igandean, Eliz elkartasuna ospatzen eta gaurkotzen dugun asteroko Pazkoan aurkitzen gara. Komunioa lokarri sendoagoz lotzeko dohaina ematen zaigu. Alai eta esker onez ospa dezagun Jesusek eman digun elkartasun hori.

FaLang translation system by Faboba

Gure cookieak eta hirugarrenenak erabiltzen ditugu helburu analitikoetarako eta publizitate pertsonalizatua erakusteko, zure nabigazio-ohituretan oinarrituta (adibidez, bisitatutako orrialdeak). Cookie guztiak onar ditzakezu "onartu" botoia sakatuz edo horiek konfiguratuz edo haien erabilera ukatuz "konfiguratu" botoia sakatuz. Informazio gehiago lor dezakezu edo, ondoren, doikuntzak aldatu gure Cookien politikan.